Centro de Interpretación dos Muíños, "Pozo do Cachón"

Unha localización extraordinaria é un dos atractivos desta enorme construción. O seu funcionamento aproveitaba o movemento das mareas grazas ao seu dique de máis de 230 metros que acumulaba a auga da pleamar e ao abrir as comportas accionaba os mecanismos da moenda.

Construído a principios do s.  XIX chamóuselle Muíño de Bazarra, polo nome do seu construtor. Foi rehabilitado en 1990 por iniciativa municipal. Consta de dúas plantas, na inferior está a entrada de augas, mentres que na planta superior atopábase a maquinaria. Coa pleamar acumulábanse as augas no dique e, cando o nivel baixaba, abríanse as comportas. Desta forma a auga saía con forza polos condutos triturando o gran. A pleno funcionamento era capaz de moer máis de 200 quilos de millo nunha hora, nunha época na que isto representaba un alto valor económico. Como curiosidade pódese destacar que a parte destinada a almacén foi empregada como casa de baño con efectos medicinais.

Hoxe, ademais de centro de interpretación dos muíños, acolle actividades culturais e reunións e funciona como punto de información turística.